الصيام أثناء الحمل

الصيام أثناء الحمل

هل الصيام آمن على البيبي؟

الحقيقة مفيش اجابة قاطعة لكن الدين ما بيفرضش علىكي كمرأة حامل انك تصومي. عندك رخصة تفطري وتعوضي الأيام الي فطرتيها. لكن لو قررتي انك تصومي يبقى لازم تكوني قوية عشان ما يكونش فيه خطر عليكي ولا على طفلك.

الأبحاث بتقول ان الأطفال الي أمهاتهم صاموا مع الحمل مافرقرش حاجة عن الأطفال الي أمهاتهم فطروا باستثناء ان أحيانا وزنهم وطولهم بيكون أقل حاجة بسيطة.

ازاى أعرف اذا كان جسمي حيستحمل الصيام؟

لو وزنك وأسلوب حياتك عامة صحي يبقى جسمك حيستحمل الصيام أكتر. البيبي بيتغذى منك ولو انتي عندك مخزون كفاية يبقى الطفل مش حيتأثر.

بعض العوامل المؤثرة على صحتك مع الصيام بتكون:

١صحتك العامة قبل الحمل

٢مرحلتك في الحمل

٣عدد ساعات الصيام في اليوم

الصيام في الصيف أكيد بيكون أصعب كتير من الصيام في الشتاء، غير انه بيعرضك للجفاف عشان الأيام بتكون أطول ودرجات الحرارة أعلى.

ازاي أستعد لرمضان؟

اعملي خطة من قبلها عشان تكوني مستريحة.

١راجعي الدكتور قبل ما تصومي عشان يأكدلك ان مفيش موانع للصيام زي السكر أو الأنيميا.

٢قللي الكافيين على أد ما تقدري قبل رمضان عشان ما يجلكيش صداع كعرض لانسحاب الكافيين.

٣اتفقي في الشغل انك تشتغلي عدد ساعات أقل أو انك تاخدي أوقات راحة أكتر.

٤اسألي دكتورك على احتياجاتك الغذائية عشان تركزي عليها.

٥اكتبي ليستة بكل الأكل والشرب الي بتاخديه عشان تفتكري.

٦حضري من بدري بانك تشتري مكونات الأكل عشان ما تتزنقيش.

ايه العلامات الي لو حصلت أقلق؟

١وزنك مش بيزيد كفاية أو بيقل

٢بتعطشي جامد أو بتعملي بول كتير أو لونه بدأ يغير. دي أعراض جفاف وبتساعد على التهابات مجرى البول.

٣بتحسي بالصداع أو آلام أخرى

٤بتدوخي أو بترجعي

امتى لازم تتصلي بالدكتور بسرعة؟

١فيه تغير ملحوظ في حركة البيبي أو انه مش بيتحرك كفاية

٢بتحسي بانقباضات مؤلمةودي ممكن تكون بداية ولادة مبكرة

٣بتحسي بدوخة أو ضعف أو تعب حتى بعد ما تكوني مريحة كويس. اكسري صيامك على طول واشربي مياه بملح أو سكر أو محلول جفاف. اتصلي بالدكتور فورا.

ازاي أسهل الصيام مع الحمل؟

١تفادي الضغط تماما وخليكي هادية. الستات الحوامل الي بيصوموا أحيانا بيزيد عندهم هرمون الكورتيزول بسبب التوتر.

٢ارتاحي على أد ما تقدري حتى لو باقي الناس بيسهروا

٣خليكي في الظل وفي مكان بارد على أد ما تقدري عشان تتفادي الجفاف

٤ما تمشيش كتير ولا تشيلي حاجة تقيلة

٥قللي جامد من شغل البيت وأي حاجة تحسسك بالارهاق

ايه أحسن طريقة أكسر بها صيامي؟

ضروري تتسحري كويس وتشربي مياه كتير في السحور والفطار.

١اختاري الأكل الي بيديكي طاقة فترة طويلة زي النشويات المعقدة والحبوب الكاملة والأكل الي محتوي على ألياف عالية زي الخضار والفاكهة المجففة والي كمان حتقلل من فرص الامساك

٢تجنبي الأكل الي محتوى على سكر عالي عشان ما يرفعش من مستوى السكر في الدم. السكر ده بيتحرق بسرعة ومستواه بينزل بسرعة وده يحسسك بدوخة وضعف.

٣قللي من الأكل الي فيه دهون عالية

٤خدي البروتين الي محتاجاه من خلال أكل الفول والمكسرات واللحوم المطبوخة جيدا والبيض.

٥اشربي من لتر ونص ل٢ لتر مياه أو سوائل أخرى بين المغرب والفجر وتجنبي المشروبات الي فيها كافيين زي الشاي والقهوة. الكافيين بيزود من كمية المياه المفقوده في البول وده ممكن يسبب الجفاف.

وكدة كدة جربي يوم أو اتنين ولو تعبتي ماتكمليش. وربنا يتقبل منا ومنكم.

Share this post

Leave a Reply