نصائح للعرسان (1) ما هي أهم فحوصات قبل الزواج

فحوصات قبل الزواج

نصائح للعرسان (1) ما هي أهم فحوصات قبل الزواج

فحوصات قبل الزواج ، لو انتي عروسة النصايح دي ليكي … ولو تعرفي عرسان مقبلين على الجواز اعمليلهم منشن عشان يتابعوا السلسلة دي.

فحوصات قبل الزواج مهمة جدا وبتساعد في تجنب مشاكل كتيرة قبل الجواز

كثير من الأسئلة بتدور في عقل البنات اللي هتتجوز، منها أسئلة بخصوص الأمور المالية والتجهيزات اللي قبل الجواز، ومنها أسئلة مُتعلقة بصحتها وبأول ليلة في عش الزوجية، ده غير أسئلة كتير عن الحمل والولادة وغيره وغيره.

الأسئلة دي هي اللي هنجاوب عليها بإستفاضة في السلسلة دي عشان تبدأي حياتك وإنتِ سعيدة ومُطمئنة وهنبدأ بـ فحوصات قبل الزواج .

السؤال الأول – إيه هي فحوصات قبل الزواج ؟

عندنا أربع أقسام رئيسية لـ فحوصات قبل الزواج:

أولاً: فحوصات لتجنب الأمراض الوراثية:

وهي فحوصات للتأكد إن الطرفين ماعندهمش أمراض تنتقل من الأم أو الأب للطفل عن طريق الوراثة، ودي فحوصات بتتم بشكل خاص في حالات جواز الأقارب.

من أهم الأمراض دي، فقر الدم المنجلي Sickle-cell disease (SCD)، اللي بيتسبب في كسر كرات الدم الحمراء، والثلاسيميا Thalassemia، اللي كمان بتأثر علي كرة الدم الحمراء وبتأثر علي قدرة مادة الهيموغلوبين في الدم إنها تقوم بوظيفتها بشكل طبيعي.

ثانياً: فحوصات الأمراض المُنتقلة جنسياً وعن طريق الدم:

فحوصات الأمراض المنتقلة جنسياً Sexually Transmitted Diseases (STDs) زي ما الاسم بيقول هي أمراض زي الإلتهاب الكبدي ب و سي الي بتنتقل عن طريق التواصل الجنسي أو الدم أو اللعاب أو استخدام فوط مش نظيفة وطرق أخرى. الSTDs للأسف ممكن تنتقل من الأم للجنين كمان وعشان كدة ضروري نعمل التحليل ده قبل الجواز.

ثالثاً: فحوصات الدم:

الدكتور هنا بيحدد فصيلة دم الطرفين وبيحدد عامل ريسس RH. لكن، ايه هو ال RH ده وايه اللي لازم أعرفه عنه قبل الجواز؟ ببساطة عامل ريسس أو ال RH ده فحص بتعمله الزوجة عشان تشوف هو (إيجابي +) ولا (سلبي -)؛ لإنه في حالة إنه (سلبي -) ده بيتطلب عمل فحوصات علي الزوج لإنه لو طلع ال RH للزوج (إيجابي +)، في الحالة دي هتضطر الزوجة إنها تاخد حقنة المصل المُضاد anti D أثناء الحمل وبعد الولادة، عشان نتجنب فقدان الجنين بعد الحمل الأول؛ وبالتالي بننصح إن تتم الفحوصات في الأول لأخذ الإحتياطات اللازمة.

رابعاً: فحوصات الخصوبة:

الفحوصات دي بيعتبرها كتير من الناس إنها من أهم الفحوصات اللي لازم تتعمل قبل الجواز، لتجنب أي ضرر نفسي وجسدي للطرفين.
فحوصات الخصوبة – من إسمها – بتفحص قدرة الطرفين علي الإنجاب، يعني بمعني أصح، مافيش أي مانع طبي واضح لعدم الإنجاب.

طيب إيه هي الفحوصات دي؟ بالنسبة للست، بيتم فحص هرمون الإستروجين، المسئول عن تحضير الرحم للحمل، وهرمون البروجيستيرون، المسئول عن تهيئة الرحم لعملية التبويض، كمان هرمون FSH اللي بيحفز نضوج الخلايا الجنسية عند الطرفين، واللي كمان بيلعب دور كبير في عملية التبويض.

أما بالنسبة للرجال، فبيقوموا بتحليل السائل المنوي واللي بيفحص عدد الحيوانات المنوية وشكلها وحركتها.

لو انتي عروسة تابعي سلسلة النصائح دي ضروري ولو تعرفي حد بيتجوز شاركي معاه السلسة دي … ويا رب كل العرسان يعيشوا في سعادة وصحة تمام.

تقدروا تعرفوا أكثر وتقروا مقالات ونصائح طبية

تقدروا تتابعونا على صفحتنا علة الفيسبوك مركز دكتور حسن جعفر لصحة المرأة

وتابعوا قناتنا على اليوتيوب وتشوفوا فيديوهات طبية لصحة المرأة

Share this post

Leave a Reply